Cullittivu “Parlemu corsu !”, u 26 di sittembri 2007.
U Cullittivu « Parlemu Corsu ! » hè primurosu d’agiscia par fà campà a lingua corsa. U meddu par quissa hè di fanni usu u più pussìbuli. Tocca à inghjunu à fà a so parti ; hè u missagiu ch’è no vulemu purtà è spiremu di riescia à trasmetta a noscia fedi in ‘ssu duminiu. Di sicuru a vuluntà pupulara ùn pò fà tuttu è emu bisognu d’un aiutu forti da i puderi pùblichi. Era u sensu di i dumandi ch’emu fattu quand’è no ci semu ritrovi di pettu à u Prima Ministru.
U scontru cù u Prima Ministru
U scontru cù u Prima Ministru
Vènnari u 21 di sittembri, u cullittivu « Parlemu Corsu ! » hà scontru u Prima Ministru François Fillon. Era affaccatu in Còrsica par stà à senta parechji attori di a sucità isulana. Quand’eddu hà vistu l’attori culturali hè statu par no l’uccasioni di ramintà quant’è no ghjudichemu nicissariu d’offra unu statutu di lingua ufficiali à a lingua corsa.
Ci n’hè bisognu di ‘ssu statutu par fà un travaddu à nantu à i cuscenzi, valurizendu a lingua corsa. Durenti à un tempu troppu impurtanti hè statu imparatu à i corsi chì a so lingua era senza valori è ch’edda riprisintaia unu inciampu par irriescia in a vita, calcosa à pruscrì dunqua. D’unu statutu pà a lingua, ci n’hè bisognu dinò parchì hè indispinsèvuli par uttena i meza d’una pulìtica linguìstica ambiziosa. Si tratta di ghjunghja à una sucità bislingua. Par quissa femu 16 pruposti. Una chì ci pari impurtanti hè d’assicurà una furmazioni cunsiquenti ubligatoria par tutti i parsunali di tutti i impresi di l’ìsula. Hè ciò ch’è no avemu dittu à u Prima Ministru.
L’avemu parlatu dinò d’insignamentu tistimuniendu chì u bislinguìsimu annunciatu in i scoli hè beddu suventi una illusioni. Timimu allora chì u pianu di a CTC chì s’addrizza à a sucità sana sana, ùn fussi ancu eddu chè una illusioni intratinendu u sìntimu chì calcosa hè fattu pà a lingua. Appughjassi à nantu à u vuluntariatu di l’aienti ùn basta micca, ci voli à passà à l’ubligazioni, ancu for’ di scola. Intantu, ricunniscimu chì i mutivazioni di l’iletti corsi sò novi è più pusitivi chè nanzi. Emu fattu dinò u custatu, à l’uccasioni di u scontru di u ministru, chì i nosci iletti ani accittatu di senta dì chì à una èpica tantu luntanu, tuttu era fattu par minurà a lingua corsa. Prova ch’eddi càmbiani i so mintalità, ma li tocca quantunqua à fà ancu di più sforza s’eddi vòlini pirmetta à u corsu di campà par di veru.
Stondi corsi
Al di là di ciò ch’è no pudemu dumandà à l’iletti, pinsemu chì tocca à inghjunu di fà a so parti par cuntribuì à una vera rinnàscita di u corsu. Hè par quissa ch’è no avemu imaginatu di rializà « Stondi Corsi » à nantu à l’ìsula. Ripiddemu quì u cuncettu ilaburatu à a bibbiuttecca di Santa Lucìa di Portivechju in u 2003. Sò mumenta privilighjati indu’ a sola lingua par isprìmasi hè u corsu. Cuntemu di principià di nuvembri cù a spirenza di fanni parechji à parta da l’annu 2008. Vultaremu tandu à nantu à ‘ssa nuzioni par ispiigalla di più.
Par compia tinimu à annuncià chì da quì à trè sittimani à u più avaremu un situ internet (u so addrizzu sarà www.parlemucorsu.com). L’aienti ci pudarani truvà infurmazioni à nantu à a noscia dimarchja è ci pudarani ancu signà a pitizioni ch’emu lampatu pà a difesa di a lingua corsa.
À tutti, dimu à prestu ! È « ch’edda campi a noscia lingua ! »
