In a sala di a mirìa di Patrimoniu s’èrani aduniti guasgi 80 parsoni : i vinaghjoli di u circondu, in attività o à a ritirata, tutti cuntenti d’essa vinuti par isprìmasi à nantu à u so mistieru è dinò l’abitanti di u locu è ancu d’al di là (di Bastia, di a Castagniccia, di u Niolu, di Portivechju…).
Par cumincià Micheli Leccia hà prisintatu à l’accorta a dimarchja di u Cullittivu, ramintendu u so principu fundatori : d’una parti fà dumandi pricisi à u Statu è à i Cullittività par uttena i misuri nicissarii par salvà a lingua corsa è ghjunghja à un veru bislinguìsimu in a sucità, è d’una antra parti fà a dimustrazioni chì a pupulazioni adirisci è participeghja à ‘ssa impresa. Hè un travaddonu è i « stondi » ni fàcini parti. Hè Dumènica Martinetti Gazaniol, dirittrici di a bibbiutecca di Santa Lucìa di Portivechju, chì hè à l’urìcini di ‘ssu cuncettu. Tandu hà spiigatu ciò ch’eddu era : l’aienti invitati pà a « stonda » pàrlani à nantu à u tema sceltu è solu in corsu (Hè a règula Santa è Sacra !). Hà dumandatu dinò à quiddi prisenti di rifletta à d’altri idei chì pudarìani incuraghjì à a pratica di u corsu è di scrìvali dopu à nantu à un quaternu.
Ghjuvan’ Battisti Arena, ghjòvanu vignaghjolu di Patrimoniu è membru di u Cullittivu era incaricatu d’animà u dibàttitu, dendu a parola à l’uni è l’altri è vighjendu à ciò chì u francesu ùn s’affacchessi micca in a discursata. I più anziani (Nunziu Olmetta, i Giovanetti bapu è fiddolu, Dumè, Simon, Pierre Louis …) ani parlatu i prima, par ispiigà di manera mori tènnica com’eddi facìani par travaddà a vigna intali à l’anni sissanta. L’aienti prisenti si sò avvisti tandu quantu era riccu u vucabularu di a lingua corsa par trattà di i diffarenti maneri di fà a putera o par ispiigà u travaddu in leia cù a luna… Parechji parsoni in l’asistenza chì t’ani calza in u so ortu, ani prufittatu di l’uccasioni par fà uni pochi di dumandi à i vinaghjoli sperti. Ma nanzi à tuttu, èrani cuntenti di pudè sprìmasi in lingua corsa à nantu à un tal sughjettu. Dopu s’hè parlatu di u rolu di i cunfraterni in a prufissioni cù a participazioni di Jean-Louis Santa Maria è di Christian Andreani. Ani ivucatu allora a criazioni di Patrimoniu cù a ligenda di San Martinu è ci ani datu spiigazioni à nantu à a scelta di i culora pà u vistitu di i cunfratedda (u verdu pà a vigna, u rossu pà u vinu è pà a cinta tradiziunali corsa). U sughjettu hè duvintatu più icunòmicu quandu u pùblicu hà vulsutu sapè ciò chì oghji faci a rinumata di i vina patrimuninchi è ancu isulani. I vignaghjoli ani rispostu tandu ch’eddu era a so unità, ma dinò di sicuru a qualità di i vigni par vìa di a giulugìa è di u soli è po ancu a so fidezza à pràtichi anziani di cultura… Par compia a discursata hà purtatu à nantu à i vindemii è à nantu à u rolu impurtanti in i tempa ch’eddi avìani i donni à ‘ssu uccasioni quì. Vindemii chì oghji si fàcini più à bona ora chè nanzi.
Par cuncluda si pò ritena chì tutti quiddi prisenti sò stati cuntenti di pudè participà à un dibàttitu cussì riccu in lingua corsa. Èrani quì par tistimunià di a so vodda di veda l’usu di u corsu sviluppassi è duvintà una pràtica cumuna in a sucità. Intornu à un bichjeri di vinu uffertu da i vinaghjoli l’aienti ani cuntinuatu à parlà, chjachjarendu cù i membri di l’associu « A Capella » criatu da pocu in Patrimoniu. ‘Ssi parsoni s’èrani affaccati numarosi è pènsani ancu eddi di rializà una « stonda » tutti i dui mesa.
U Cullittivu « Parlemu corsu ! » cuntinueghja à suminà daretu ad eddu è ci ni raligremu tutti !
