Presentazione | Parlemu Corsu

U cullettivu Parlemu Corsu

Vulemu cuntribuisce à l’elaburazione prugressiva, in Corsica, d’una sucetà bislingua (Corsu/Francese).

Hè una adunita di persone è ancu d’associ chì si ricunnoscenu in a dimarchja di u Cullettivu.

Oramai sò più di 800 i membri di “PARLEMU CORSU !” : 618 persone, 115 associ è 112 gruppi culturali o artisti.

Fà nant’à u terrenu (Vede l’Archive è I nostri prugetti).
Circhemu à mustrà l’esempiu è à inghjennà iniziativi in tutta a sucetà isulana.

Dumandà i mezi ghjurìdichi, umani è finanziarii per pudè appiegà u nostru pianu per a lingua (Vede I nostri 16 pruposte rializate dapoi u 2007 è sempre d’attualità).
Circhemu à purtà una rivendicazione di modu uriginale, festiva è culurita senza esità à fà in furia colpa di forza pè surprende è interpillà la ghjente.

Travagliemu cù i ripresintenti di l’altri lingue minuritarie pè arricchisce a nostra dimarchja è acquistà di più pesu è ancu una dimensione internaziunale
(Vede a pagina “Lingue minurate è u “Prutucollu pè a garanzìa di i diritti linguìstichi”).

Connoscu un cullettivu
Chì più và, più ghjè attivu
Da i Corsi apprezziatu
È di core seguitatu
Mette la lingua à l’onore
Ci travaglia cù fervore

Parlemu corsu chjamatu
Si cumporta in suldatu
Difende a Cursichella
Vole esse sentinella
Milita cù devuzione
Contr’à l’acculturazione

Eccu cumu un professore
Da tant’anni cun ardore
Ind’a cruciata lampatu
Pè u corsu bè parlatu
Quant’ellu hà cumbattutu
È risultati ottenutu !

A so lutta face frutti
È ne prufittemu tutti
Cù issa battaglia pietosa
Altruista, generosa
È st’opera meritoria
Fermerà in a memoria

Nasce trà Micheli Leccia
È i scontri una treccia
D’amicizia ch’adunisce
Ingrenda è po fiurisce
Per chì lu corsu parlatu
Sia sempre adopratu.

Cathy Campana 29/04/23