U Cunsigliu di Statu francesu riaffirma chì a lingua di a “ripùblica” hè u francesu è ch’edda hè dunqua a lingua à impiicà in unu imicìculu astituziunali… A sapìami. Nisciuna suspresa. A dinuncemu. Rivindichemu unu statutu di cuufficialità. Ben intesu, ma dopu… Ch’eddu ùn sighi una scusa par ùn fà nudda pà a noscia lingua è par ùn adupralla micca.
D’altrondi, u 20 di maghju, veni à dì dipoi 3 sittimani, emu inviatu un cartulari à tutti i gruppa pulìtichi di l’Assamblea di Còrsica, à membra di l’isicutivu è ancu di u “CESEC”. Si tratta d’una pruposta di pianu sucitali pà a lingua corsa. Or par avà, emu avutu dui risposti : Pierre Ghionga chì dici chì tuttu li cunveni, po, u PNC, ma d’una manera un pocu particulari… par vìa di i reti suciali è à traversu una pusizioni di Jean-Christophe Angelini, chì dici chì a lingua hà bisognu d’un “plan de sauvegarde” è d’una “politique globale et volontariste”. Tandu, hè sicura ch’è no semu stunati ch’eddu ùn parlessi micca d’a pruposta di pianu sucitali d’u Cullittivu “Parlemu Corsu !” ??? Voli dì ch’ùn vi cunveni ? Ma allora chì prupuniti di meddu ? Parchì metta sottu silenziu u nosciu pianu ?…
Semu cunvinti chì s’eddi sò appiigati i misuri ch’è no prupunimu cambiarìa a situazioni. Ma, più passa u tempu è più a tacca ni duventa diffìciuli… Ci hè urgenza à agì ! Chì i partita pulìtichi piantèssini i so lìtichi è cuncurenzi, praghjudizièvuli à a lingua. Parchì tutti ùn prufìttani micca di l’asistenza di “Parlemu Corsu” ? Hè un cullittivu chì in 18 anni d’impegnu accanitu pà a lingua, hà fattu a prova di a so indipindenza è di a so capacità à adunì di modu largu, a sucità civili è i pulìtichi di tutti i tindenzi. Postu chì ci hè u pianu prupostu da “Parlemu Corsu !”, cunsacrètili una sissioni à posta à l’Assamblea di Còrsica… Dibattiti à nantu, amandètilu ancu, à nantu à certi punta, in tutti i casi, sirvìtivini par isbuccà à nantu à una pulìtica nova à favori d’a lingua !
Pianu sucitali : https://parlemucorsu.corsica/wp-content/uploads/2025/06/pruposti-sucita-l-iletti.pdf
