u 30 di ghjinnaghju 2010 : Cunsulta Ginirali in Poghju Mezana.

U sustenu di Dumenicu Benassi :

Dumè Benassi*, u 30 di ghjennaghju 2010

Hè bella sicura chì noi ci face piacè di parlà è di sente parlà u corsu.

A raggiò hè chì l’avemu sempre appena praticatu è chì hè a lingua di a nostra zitellina è quella di una vita chì avemu cunnisciutu è chì si n’hè passata cum’è tante cose in stu mondu.

Ciò chì ùn hè micca intratinutu, perchè ùn si n’hà più l’utilità, si more pianu pianu.

Forse e lingue pocu parlate sò cundanate à sparì un ghjornu per lascià piazza à quelle praticate per assai mondu.

I scambii, l’economia, l’infurmazione, a moda, a musica, si sò stesi à u mondu sanu. Quelli chì ùn prudugenu nunda ùn anu besognu di tante parole per dì la.

Ci hè dunque da fassi u penseru, simu d’accordu. Ma u fattu si stà chì intantu ci vole à campà incù ciò ch’è no simu, à u mumentu ch’è no simu, hè chì per esse megliu avemu besognu di stu pezzone di noi ch’hè la nostra lingua.

Forse un ghjornu avaremu da sparì ma ùn hè micca una raggiò per more subbitu.

A pratica di u sport m’hà amparatu chì nunda ùn s’ottene senza sforzi.

Hè per ciò ch’hè necessariu di travaglià incù l’instituzioni, l’associ, a stampa, tutti quelli chì ponu, chì sanu, chì volenu, per praticà, per utilizà u corsu chì hà prugressatu sti pochi tempi, più chè ciò ch’ellu si crede.

Chì sà s’è a lingua corsa, intantu chè lingua matura ùn stà micca nascendu oghje ?

Basta ch’ella ùn sia micca solu un rigalu di a Republica per facci piacè ma una vuluntà è un besognu veru di a nostra parte.

Contu nantu à Michele per assestà l’ortografia.

Bona ghjurnata.

Dumè.