CUMINICATU DI U CULLITTIVU « PARLEMU CORSU ! »
U Cullittivu « Parlemu Corsu ! » si ralegra di a publicazioni in lingua corsa di u misincu « U Nutiziale ». Filiciteghja u cutidianu Corse-Matin è i so ghjurnalisti chì ani purtatu stu prugettu.
Parlà di tuttu in lingua corsa. Metta à paru a noscia lingua à tutti l’altri senza cumplessa. Avè una visibilità maiori par aiutà à a sparghjera di u corsu. Dà a vulintà à tutti di praticà u corsu fendu capì chì l’affari pidda impurtenza è ch’eddu và insembu cù una mossa ginirali…
Corse-Matin hà rillivatu a sfida è salutemu a so cuntribuzioni à a criazioni d’una sucità bislingua.
È puri, tuttu inghjunu si ni sarà accortu è parechji sò quiddi chì a ci ani ditta : solu u parlà cismuntincu, da u tìtulu di u ghjurnalettu à u cuntinutu di l’artìcula, hè statu adupratu.
Si sà chì, da u principiu, « Parlemu Corsu ! », pugna di rispittà a pluralità di a lingua corsa : inghji azzioni, inghji publicità d’un ivinimentu, inghji affissettu hè dittu o scrittu in u parlà di u locu ‘d’eddu si passa. I nosci appiccicatoghja, i nosci sciarpi sò in dui virsioni (Sucità è Sucetà bislingua) è a parità di i variità si ritrova ancu in i paroli chì cumpònini u nosciu logò.
Ùn dupitemu chì Corse-Matin sà quantu eddi sò attaccati i Corsi à i so parlà. Sà chì a so rispunsabilità hè tamanta di pettu à u so nùmaru di littori : quidda di pudè muscià l’asempiu cù i so scelti linguìstichi…
Hè sicura chì a siconda idizioni di u Nutiziali pò essa l’uccasioni di muscià a ricchezza di a noscia lingua, fendu sta volta una publicazioni solu in u parlà pumuntincu (principiendu cussì una altirnenza rigulari) ! È spiremu dinò di ritruvà a lingua corsa in a so svariatezza in parechji artìcula di u cutidianu !
Emu sempri dumandatu chì u corsu sichi rispittatu à pettu à u francesu, è ‘ssa dimarchja ci voli ch’edda si ritrovi in a primura di i diffarenzi linguìstichi di a lingua corsa…
Avviva u misincu « U Nutiziali » è tutti l’altri media, attori di a sparghjera di a noscia lingua !
Avviva a lingua corsa, ricca di a so svariatezza !
